ಹೆಂಡತಿ ಅಂದರೆ ಖಂಡಿತ ಅಲ್ಲ / Hendati andare khandita alla!!

ಹೆಂಡತಿ ಅಂದರೆ ಖಂಡಿತ ಅಲ್ಲ

ದಿನವೂ ಕೊರೆಯುವ ಭೈರಿಗೆ!

ಭಂಡರು ಯಾರೋ ಆಡುವ ಮಾತಿದು,

ಬೈದವರುಂಟೆ ದೇವಿಗೆ?!

ಸಣ್ಣ ಸಂಬಳದ ದೊಡ್ಡ ಗಂಡನನು

ಸಾಕುವ ಹೆಣ್ಣಿನ ಕಷ್ಟ!

ಹೆಣ್ಣಿಗೆ ಮಾತ್ರವೇ ಗೊತ್ತು

ಸಾಕಿ ಬೈಸಿಕೊಳ್ಳೊ ಅನಿಷ್ಟ!

ಹೆಂಡತಿ ಅಂದರೆ ಖಂಡಿತ ಅಲ್ಲ

ಭಾರೀ ಕತ್ತರಿ ಜೇಬಿಗೆ!

ಬಿರಡೆಯಲ್ಲವೆ, ಅವಳು ಗಂಡಿನ

ದುಂದುಗಾರಿಕೆಯ ತೂಬಿಗೆ!

ಹೆಂಡತಿಯೆಂದರೆ ಚಂಡಿಕೆಯಂತೆ

ಬೋಳು ಬೋಳಾದ ಬಾಳಿಗೆ!

ಅರಳಿದ ಗರಿ ಗರಿ ಸಂಡಿಗೆಯಂತೆ

ಬಿಸಿ ಬಿಸಿ ಅನ್ನದ ಸಾರಿಗೆ!

ಅನ್ನಿಸಿಕೊಂಡೂ ಮನ್ನಿಸಿ ನಗುವ

ಹೆಂಡತಿ ಕೇವಲ ಹೆಣ್ಣೇ!

ಗಂಡತಿ ಕೂಡಾ ಹೌದು ಅವಳನು

ಅನ್ನುವ ಬಾಯಿ ಮಣ್ಣೆ!

ಹೆಂಡತಿ ಎಂದರೆ ಒಳಗಿನ ಹರುಕನು

ಮರೆಸುವ ಬಣ್ಣದ ಶಾಲು!

ಮೆಟ್ಟೂ ಆಗಿ ಜುಟ್ಟೂ ಆಗಿ

ಕಾಯುವಂತ ಕರುಣಾಳು!

                                             - ಎನ್. ಎಸ್. ಲಕ್ಷ್ಮಿ ನಾರಾಯಣ ಭಟ್ಟ

ನೀ ನನ್ ಅಟ್ಟೀಗ್ ಬೆಳಕಂಗ್ ಇದ್ದೆ ನಂಜು/ Nee nan attig belakangidde nanju

ನೀ ನನ್ ಅಟ್ಟೀಗ್ ಬೆಳಕಂಗ್ ಇದ್ದೆ ನಂಜು
ಮಾಗೀಲ್ ಉಲ್ಮೇಲ್ ಮಲಗಿದ್ದಂಗೆ ಮಂಜು
ಮಾಗಿ ಕುಗ್ತು ಬೇಸ್ಗೆ ನುಗ್ತು
ಇದ್ಕಿದ್ದಂಗೆ ಮಾಯವಾಗೋಯ್ತು ಮಂಜು
ನಂಗೂ ನಿಂಗೂ ಯೆಂಗ್ ಅಗಲೋಯ್ತು ನಂಜು.

ಸೀರಂಗ್ಪಟ್ನ ತಾವ್ ಕಾವೇರಿ ಒಡದಿ
ಯೆಳ್ಡೊಳಾಗಿ ಪಟ್ನದ್ ಸುತ್ತ ನಡದಿ
ಸಂಗಂದಲ್ಲಿ ಸೇರ್ಕೊಂಡ್ ಮಳ್ಳಿ
ಮುಂದಕ್ ವೋದ್ದು ನಮಗೆ ಗ್ನಾನದ್ ಪಂಜು
ಈಗ ಆಗಲಿದ್ರೇನ್ ಮುಂದ್ ನಾವ್ ಸೇರ್ತಿವಿ ನಂಜು.

ಆಗಲೋಡೋಗ್ತೆ ರಾತ್ರಿ ಬಂತಂತ್ ಅಂಜಿ
ರಾತ್ರಿ ಮುಗದೋದ್ರ್ ಆಗಲೆ ಅಲ್ವ ನಂಜಿ
ರಾತ್ರಿ ಬಿತ್ತು ಆಗಲೇ ಬತ್ತು
ಓಗೋದ್ ಮಳ್ಳಿ ಬರೋದ್ಕಲ್ವ ನಂಜಿ
ಆ ನೆಮ್ಕೆ ನನ್ ಜೀವಾನ್ ಉಳಸೋ ಗಂಜಿ.

                                              - ಜಿ. ಪಿ. ರಾಜರತ್ನಂ

ರಾತ್ರಿಯ ತಣ್ಣನೆ ತೋಳಿನಲಿ / Ratriya Tannane Tolinali

ರಾತ್ರಿಯ ತಣ್ಣನೆ ತೋಳಿನಲಿ, ಮಲಗಿರೆ ಲೋಕವೆ ಮೌನದಲಿ,
ಯಾರೋ ಬಂದು, ಹೊಸಿಲಲಿ ನಿಂದು, ಸಣ್ಣಗೆ ಕೊಳಲಿನ ದನಿಯಲ್ಲಿ
ಕರೆದರಂತಲ್ಲೆ ಹೆಸರನ್ನು.
ಕರೆದವರಾರೇ ನನ್ನನ್ನು?

ಬೇಗೆಗಳೆಲ್ಲಾ ಆರಿರಲು, ಪ್ರೀತಿಯ ರಾಗ ಹಾಡಿರಲು,
ಭೂಮಿಯ ತುಂಬಾ ಹುಣ್ಣಿಮೆ ಚಂದಿರ
ಬಣ್ಣದ ಮಾಯೆಯ ಹಾಸಿರಲು,
ಕರೆದರಂತಲ್ಲೆ ಹೆಸರನ್ನು. ಕರೆದವರಾರೇ ನನ್ನನ್ನು?

ಹಸಿರು ಮರಗಳ ಕಾಡಿನಲಿ, ಬಣ್ಣದ ಎಲೆಗಳ ಗೂಡಿನಲಿ,
ಮರಿಗಳ ಕೂಡಿ ಹಾಡುವ ಹಕ್ಕಿಯ
ಸಂತಸ ಚಿಮ್ಮಲು ಹಾಡಿನಲಿ.
ಕರೆದರಂತಲ್ಲೆ ಹೆಸರನ್ನು, ಕರೆದವರಾರೇ ನನ್ನನ್ನು?

ಹೇಗೆ ಇದ್ದರೆ? ಎಲ್ಲಿ ಹೋಗಲಿ? ಕಂಡರೆ ಹೇಳಿ ಗುರುತನ್ನು.
ನಿದ್ದೆಯ ಕರೆದು ಕಾಯುತ್ತಿರುವೆ,
ಎಂತಹ ಹೊತ್ತಿನಲು ಅವರನ್ನು.
ಕರೆದವರಾರೇ ನನ್ನನ್ನು? ಕರೆದರೆ ನಿಲ್ಲೇ ನಾನಿನ್ನು.

                                                   – ಎನ್. ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಸಂಜೆ ಬಾನಿನಂಚಿನಲ್ಲಿ / Sanje Baaninanchinalli

ಸಂಜೆ ಬಾನಿನಂಚಿನಲ್ಲಿ
ಬಿದ್ದ ಬಿದಿಗೆ ಚಂದಿರ
ಶಚೀ ತೀರ್ಥದಾಳದಲ್ಲಿ
ಶಕುಂತಲೆಯ ಉಂಗುರ.

ದೂರ್ವಾಸರ ಶಾಪವಿಗೋ
ಕವಿಯುತಿಹುದು ಸುತ್ತಲೂ,
ಕಂಡುದೆಲ್ಲ ಜಾರುತಿಹುದು
ಮೆಲ್ಲನಿರುಳ ತಮದೊಳು.

ಅಸಹಾಯಕ ತಾರೆ ಬಳಗ
ಹನಿಗಣ್ಣೊಳು ನೀರವ
ಸುಯ್ವ ಗಾಳಿ ತಡೆಯುತಿಹುದು
ಉಕ್ಕಿ ಬರುವ ದುಃಖವ.


                                       - ಜಿ. ಎಸ್. ಶಿವರುದ್ರಪ್ಪ

ದಿನ ಹೀಗೆ ಜಾರಿ ಹೋಗಿದೆ/ Dina heege jaari hogide

ದಿನ ಹೀಗೆ ಜಾರಿ ಹೋಗಿದೆ

ನೀನೀಗ ಬಾರದೆ,

ಜತೆಯಿರದ ಬಾಳ ಜಾತ್ರೆಯಲಿ

ಸೊಗಸೇನಿದೆ.

ಅರಳಿ ಅನೇಕ ಹೂಗಳು

ಬರಿದೆ ಕಾದಿವೆ,

ಹಿಮದ ಕಠೋರ ಕೈಯಲಿ

ನರಳಿ ಕೆಡೆದಿವೆ.

ಜತೆಯ ಕಾಣದೀಗ ಹಕ್ಕಿ

ಅನಾಥವಾಗಿದೆ,

ಋತು ಚೈತ್ರ ಜಾರಿ ಹೋಗಿದೆ

ಗ್ರೀಷ್ಮ ಬರುತಿದೆ.

ದುಗುಡ ನಿಧಾನ ಬೆಳೆಯುತ

ಬಾಳ ಮುಸುಕಿದೆ,

ಉಳಿದೇನಿತಾಂತ ಕಾಯುತ

ಕನಸು ಮಾಸಿದೆ.

                                                         - ಸುಬ್ರಾಯ ಚೊಕ್ಕಾಡಿ