ಹೂವು ಹೊರಳುವುವು ಸೂರ್ಯನ ಕಡೆಗೆ / Hoovu horaluvuvu sooryana kadege

ಹೂವು ಹೊರಳುವುವು ಸೂರ್ಯನ ಕಡೆಗೆ

ನಮ್ಮ ದಾರಿ ಬರಿ ಚಂದ್ರನವರೆಗೆ

ಇರುಳಿನ ಒಡಲಿಗೆ, ದೂರದ ಕಡಲಿಗೆ

ಮುಳುಗಿದಂತೆ, ದಿನ ಬೆಳಗಿದಂತೆ

ಹೊರಬರುವನು ಕೂಸಿನ ಹಾಗೆ.

                  ಜಗದ ಮೂಸೆಯಲಿ ಕರಗಿಸಿ ಬಿಡುವನು

                  ಎಲ್ಲ ಬಗೆಯ ಸರಕು;

                  ಅದಕೆ ಅದರ ಗುಣದೋಷಗಳ೦ಟಿಸಿ

                  ಬಿಡಿಸಿ ಬಿಟ್ಟ ತೊಡಕು.

ಗಿಡದಿಂದುರುವ ಎಲೆಗಳಿಗೂ ಮುದ,

ಚಿಗುರುವಾಗಲೂ ಒಂದೇ ಹದ,

ನೆಲದ ಒಡಲಿನೊಳಗೇನು ನಡೆವುದೋ

ಎಲ್ಲಿ ಕುಳಿತಿಹನೋ ಕಲಾವಿದ !

                  ಬಿಸಿಲ ಧಗೆಯ ಬಸಿರಿನಿಂದಲೇ ಸುಳಿವುದು

                  ಮೆಲು ತಂಗಾಳಿಯು ಬಳಿಗೆ;

                  ಸಹಿಸಿಕೊಂಡ ಸಂಕಟವನು ಸೋಸಲು

                  ಬಂದೆ ಬರುವುದಾ ಗಳಿಗೆ.

ಸಹಜ ನಡೆದರೂ ಭೂಮಿಯ ಲಯದಲಿ

ಪದಗಳನಿರಿಸಿದ ಹಾಗೆ;

ವಿಶ್ವದ ರಚನೆಯ ಹೊಳಹಿನಲ್ಲಿ

ಕಂಗೊಳಿಸಿತು ಕವಿತೆಯು ಹೀಗೆ.

                                         - ಚೆನ್ನವೀರ ಕಣವಿ