ಬಾರೆ ನನ್ನ ದೀಪಿಕಾ / Baare nanna deepika

ಬಾರೆ ನನ್ನ ದೀಪಿಕಾ

ಮಧುರ ಕಾವ್ಯ ರೂಪಕ,

ಕಣ್ಣ ಮುಂದೆ ಸುಳಿಯೆ ನೀನು,

ಕಾಲದಾ ತೆರೆ ಸರಿದು ತಾನು,

ಜನುಮ ಜನುಮ ಜ್ಞಾಪಕ.

ನಿನ್ನ ಬೊಗಸೆಗಣ್ಣಿಗೆ,

ಕೆನ್ನೆ ಜೇನು ದೊನ್ನೆಗೆ,

ಸಮ ಯಾವುದೇ ಚೆನ್ನೆ ನಿನ್ನ

ಜಡೆ ಹರಡಿದ ಬೆನ್ನಿಗೆ?

ನಿನ್ನ ಕನಸು ಬಾಳಿಗೆ,

ಧೂಪದಂತೆ ಗಾಳಿಗೆ,

ಬೀಸಿ ಬರಲು ಜೀವ ಹಿಗ್ಗಿ,

ವಶವಾಯಿತೆ ದಾಳಿಗೆ.

ಮುಗಿಲ ಮಾಲೆ ನಭದಲಿ,

ಹಾಲು ಪೈರು ಹೊಲದಲಿ,

ರೂಪಿಸುತಿದೆ ನಿನ್ನ ಪ್ರೀತಿ

ಕವಿತೆಯೊಂದ ಎದೆಯಲಿ.

                                       - ಎನ್. ಎಸ್. ಲಕ್ಷ್ಮಿನಾರಾಯಣ ಭಟ್ಟ