ದಿನ ಹೀಗೆ ಜಾರಿ ಹೋಗಿದೆ/ Dina heege jaari hogide

ದಿನ ಹೀಗೆ ಜಾರಿ ಹೋಗಿದೆ

ನೀನೀಗ ಬಾರದೆ,

ಜತೆಯಿರದ ಬಾಳ ಜಾತ್ರೆಯಲಿ

ಸೊಗಸೇನಿದೆ.

ಅರಳಿ ಅನೇಕ ಹೂಗಳು

ಬರಿದೆ ಕಾದಿವೆ,

ಹಿಮದ ಕಠೋರ ಕೈಯಲಿ

ನರಳಿ ಕೆಡೆದಿವೆ.

ಜತೆಯ ಕಾಣದೀಗ ಹಕ್ಕಿ

ಅನಾಥವಾಗಿದೆ,

ಋತು ಚೈತ್ರ ಜಾರಿ ಹೋಗಿದೆ

ಗ್ರೀಷ್ಮ ಬರುತಿದೆ.

ದುಗುಡ ನಿಧಾನ ಬೆಳೆಯುತ

ಬಾಳ ಮುಸುಕಿದೆ,

ಉಳಿದೇನಿತಾಂತ ಕಾಯುತ

ಕನಸು ಮಾಸಿದೆ.

                                                         - ಸುಬ್ರಾಯ ಚೊಕ್ಕಾಡಿ 

ಮುನಿಸು ಥರವೇ ಮುಗುದೆ / Munisu Tharave mugude

ಮುನಿಸು ಥರವೇ ಮುಗುದೆ 

ಹಿತವಾಗಿ ನಗಲು ಬಾರದೆ ||

ಕರಿಮುಗಿಲ ಬಾನಿನಲ್ಲಿ ಮಿಂಚರಳಲು

ತಾರೆಗಳು ಮೈಯ ಬಳಸಿ ಝುಮ್ಮೆನ್ನಲು |

ನವಭಾವ ತುಂಬಿ ತುಂಬಿ ಮನ ಹಾಡಲು 

ತೆರೆದಂತಿದೆ ಭಾಗ್ಯದ ಬಾಗಿಲು ||

ಎಷ್ಟೊಂದು ಕಾಲದಿಂದ ಹಂಬಲಿಸಿದೆ 

ನೀ ಬಂದು ಸೇರಿ ನನ್ನ ಮುದಗೊಳಿಸಿದೆ |

ಜೀವನದ ನೂರು ಕನಸು ನನಸಾಗಿದೆ 

ಮುನಿಸೇತಕೆ ಈ ಬಗೆ ಮೂಡಿದೆ ||

ಹೊಸಬಾಳ ಬಾಗಿಲಲ್ಲಿ ನಾವೀದಿನ 

ನಿಂತಿರುವ ವೇಳೆಯಲ್ಲಿ ಏಕೀ ಮನ |

ವಾಗರ್ಥವಾದಂತೆ ನಮ್ಮ ಈ ಮೈಮನ 

ಜತೆಸೇರಲು ಜೀವನ ಪಾವನ ||

                                                          - ಸುಬ್ರಾಯ ಚೊಕ್ಕಾಡಿ.